公告

開飯宅女 : 不善交際, 身患多種異疾, 包括: 間歇性失憶症, 周一勞累候群症, 減肥錯亂神經綜合症, 燥狂暴食症....等等 .
熱愛夢工場電影, 迪士尼死忠粉絲, 只愛MARVEL不愛DC

本人並非打手, 所有文章均沒有金錢/車馬費交易, 不會因為試食就算難食都會講好食, 亦不會主動向各餐廳酒店R免費飯食. 本人只是獨立純分享, 不屬任何組織或商業團體. 為免誤會, 由2017年2月起, 本人不再出席任何試食飯局, 請各餐廳不用邀請我, 謝謝!

如果大家想睇宅女舊一點的文章(2007年-2012年)可以參觀一下以下舊BLOG:

2007年10月14日 星期日

中菜篇 - 德福翠園

好耐未同家人出街食晚飯,趁星期日放假就近近地係德福食吧.
知道德福開左間翠園,兩老鐘意食中菜,就試下呢間粵菜餐廳吧.
一睇門口裝修好有格調又堂皇,就知道佢收費都唔會係低檔.

點開晚飯市,我地準時到達,雖然冇訂位,不過因為人少少得3個,所以好快就比左枱我地.
由於人少,而且我下午食到好飽,所以唔敢叫太多,只係鎖定目標點左佢地比較出名既小菜:

鮑汁素珍菌 ($38)
呢個係餐前小食,所以份量唔係好多. 不過水準十分高,個鮑汁味道好濃厚,令幾款唔同既什菌都好入味,但絕對唔會咸,反之十分開胃.大家都有讚無彈,好快就清哂碟.

爽脆海蜇頭 ($38)
海蜇頭每片都十分大,又飽滿.食落好爽,真係好脆.而芥末醬亦食得出係好野,好順喉. 呢味小食真係每次來都必點!!

糯米炸釀鳳翼 ($38一隻)

呢個真係一大驚喜! 一夾起巳經感覺到佢既皮好脆好薄!!外皮炸得好香好脆,但又一d都唔油膩.雞肉好嫩好滑,入面既糯米飯亦好惹味好黏口.而且一隻既size亦唔細,食左一隻都巳半飽了...

蟹皇帶子炒鮮奶 ($108)

呢味又係水準十分高. 材料真係足到離哂譜,d蟹皇多到真係啖啖都有,帶子亦十分肥美,絕不是雪藏的. 炒鮮奶帶點奶騷味,但唔係話十分強烈,一般人都可以接受到. 3樣野加埋味道真係無可挑剔. 如果想味道更加濃,可以加埋面頭幾條金華火腿一齊食,味道會更加香濃.不過我本人覺得唔加都巳經100分了.

蝦籽炆柚皮 ($68)
其實食粵菜好少會點呢味, 不過貪得意想試下大厨既功夫. 又一驚喜!首先柚皮選得十分好,好飽滿皮好厚.柚皮上枱時巳經炆到'林'哂,柔軟度真係100分.食落完全冇柚皮既苦澀味,甚至完全唔覺得係食緊柚皮,好似食緊一舊好柔軟好'林'既薯仔一樣.個汁係呢味菜入面亦係主要角色, 令到整體變得事半功倍.

迷你桶仔飯 ($18)
其實係雞肉冬菇炒飯.一碗飯既份量剛剛好.個迷你桶好可愛! 而飯亦炒到粒粒分明,好入味,不錯.

蛋白杏仁茶 ($19)
賣相真係好靚.除左有杏仁茶旁邊仲有一舊細細既蛋糕仔. 先講杏仁茶,真係即磨而唔係開粉既.而且蛋白真係有好多,食落口感真係一絕.唯一唔好既係份量太少啦....咁好食既野咁細碗真係唔多夠. 蛋糕仔其實冇咩特別, 不過咁細心有誠意真係加左唔少分.

蓮茸西米焗布甸 ($19)
呢個反而唔係好特別.當然水準亦有番咁上下,鐘意食開西米布甸既人就一定唔會彈佢既水準.

燕窩麥皮豆腐布甸 ($24)
一上枱時大家都嘩哂,因為燕窩既份量多得驚人! 估且唔好研究係咪真既燕窩,賣相同價錢都巳經win哂.布甸亦好滑,個人覺得如果冇左d麥皮,口感會更加好.

餐廳標榜用既係帝皇米糠健康油,而且絕不加味精. 食完哂以上味道咁濃既菜,真係居然唔會口渴.
雖然價錢係高左d, 不過難得菜式做得咁用心咁高水準,間唔中食下亦不妨.


翠園
Jade Garden Chinese Restaurant

九龍灣德福廣場一期F20舖 
tel: 2758 2883

沒有留言:

張貼留言

Related Posts Plugin for WordPress, Blogger...