公告

開飯宅女 : 不善交際, 身患多種異疾, 包括: 間歇性失憶症, 周一勞累候群症, 減肥錯亂神經綜合症, 燥狂暴食症....等等 .
熱愛夢工場電影, 迪士尼死忠粉絲, 只愛MARVEL不愛DC

本人並非打手, 所有文章均沒有金錢/車馬費交易, 不會因為試食就算難食都會講好食, 亦不會主動向各餐廳酒店R免費飯食. 本人只是獨立純分享, 不屬任何組織或商業團體. 為免誤會, 由2017年2月起, 本人不再出席任何試食飯局, 請各餐廳不用邀請我, 謝謝!

如果大家想睇宅女舊一點的文章(2007年-2012年)可以參觀一下以下舊BLOG:

2007年11月14日 星期三

中菜篇 - 魯一居 (巳改名為魯一居利寶閣)

呢日係老爸生日,一家人聚埋食個晚飯慶祝. 唔想再留係德福,就近近地衝出去九龍灣既megabox吧.
Megabox冇野多,係餐廳最多.好, 先來會一會呢間食山東菜既魯一居吧!

去到發現其實訂唔訂位都冇咩關係,因為晚飯時間都唔係好多人,我睇成個場坐左一半人左右.
一坐低就有2小盤涼伴豆腐乾.
豆腐乾出奇地彈牙又唔辣,味道不錯.
由於第一次來,好多野都想試, 所以決定唔叫餐,散叫:

陳醋海蜇頭($65)
好爽口, 不過好偏身,唔夠飽滿,冇咩趙頭. 而且份量好少,$65呢個價錢唔太值.

粉皮棒棒雞 ($42)
粉皮薄身雞唔會好乾,麻醬份量剛剛好, 不錯.

三色皮蛋豆腐($38)
豆腐算滑,面頭鋪滿好多蔥花,蝦米等配料.不過皮蛋切得太碎,唔細心食都食唔到.

清湯雞豆花 ($38一位)
呢個份子學美食真係頭一次試. 上湯好清,好甜,味精唔算重.佢係用雞用攪成豆腐花一樣, 食落其實係食唔出有雞,只係好似食緊一泡好輕既有雞味既蛋白一樣. 講真味道不錯,不過自問就唔係太識欣賞呢d份子學美食了.

三鮮鍋巴 ($98)
個汁頗'水', 個人比較鐘意'傑'一點. 材料好少,叫就叫三鮮,但係食來食去都只係得幾片豬肉. 不過鍋巴味道確係不錯,只係咁少材料咁既價錢就唔係好值了.

綉球全魚 (半條$138)
賣相一流.睇得出好有心機做既一道菜.不過其實味道驚喜唔大, 都係好一般既魚肉做成丸狀.

沙鍋雲吞雞 (中:$108)



中既沙鍋雲吞雞有半隻雞同6-7粒雲吞,5-6個人分每人一碗剛剛好. 雲吞皮好薄,味道不錯. 半隻雞食得出佢真係煲過既雞而唔係煲完先落雞,所以飲落既湯味道好足.而且仲加埋金華火腿落去,其實個人認為唔洗加巳經好夠味,加埋甚至覺得有少許過咸.

魯家高湯小籠包 ($24)

一籠有6個. 小籠包皮真係好薄好軟,入面既肉就普通,但係湯汁好夠.最重要係價錢唔貴,來到真係要一試.

羊肉水餃 ($36)

好少有得食羊肉水餃.雖然冇湯伴住上,但係一d都唔乾身.咬開內裡既汁好豐盛,而且羊肉味道濃郁,帶住羊少許既騷味但又唔會太過份, 相信一般人都會接受得到. 而且皮好薄,真係值得一讚.

擔擔面 ($30)
雖然巳經叫左佢唔好落辣, 但食落都仍然辣到跳舞.好難想像如果唔叫佢唔落既話會辣到咩程度. 湯雖然好'水',不過起碼都有d味.面條偏硬,整體印象普通.可以不點. 

韮王肉絲炒拉面 ($68)
份量足4-5個人每人一碗.不過面偏咸,而且材料十分少.不過好在面炒得乾身唔會好油膩,但味道好一般.

高力豆沙香蕉 ($48)
一碟有4個.每個都漲卜卜,好幾大個.豆沙偏少,味道唔係好甜,不錯.

桂花酒釀丸子 ($22)

都好大碗,2個人分都仲得. 好香桂花味,好甜好清香.丸子細細粒有趙口.

5個人埋單食左$940蚊,其實都算幾貴. 不過值得一讚既係侍應既服務態度一流,又親切又友善.如果香港多幾間呢d服務態度咁好既餐廳就好了.


魯一居
九龍灣宏照道38號企業廣場5期MegaBox 9/f 23號舖
tel: 2359 0188

沒有留言:

張貼留言

Related Posts Plugin for WordPress, Blogger...