公告

開飯宅女 : 不善交際, 身患多種異疾, 包括: 間歇性失憶症, 周一勞累候群症, 減肥錯亂神經綜合症, 燥狂暴食症....等等 .
熱愛夢工場電影, 迪士尼死忠粉絲, 只愛MARVEL不愛DC

本人並非打手, 所有文章均沒有金錢/車馬費交易, 不會因為試食就算難食都會講好食, 亦不會主動向各餐廳酒店R免費飯食. 本人只是獨立純分享, 不屬任何組織或商業團體. 為免誤會, 由2017年2月起, 本人不再出席任何試食飯局, 請各餐廳不用邀請我, 謝謝!

如果大家想睇宅女舊一點的文章(2007年-2012年)可以參觀一下以下舊BLOG:

2007年9月27日 星期四

中菜篇 - 怡東軒

中秋佳節,當然係同家人親戚食飯聚聚舊. 我家都不例外.
今年由大伯一家決定地點,最後揀左係怡東酒店既怡東軒食晚飯.
呢間中菜餐廳都好出名,好多得獎既菜式都曾經出自呢間餐廳.

去到6點幾,人唔係好多,可能係同價錢有關係. 裝修算十分不俗了.

點菜當然係由長輩負責.(以下價格不太準確,不過亦都相差不遠矣)

先來一個露荀炒蝦球($128)

份量雖然好少,但係露荀十分不錯,完全冇苦澀味同冇渣,蝦球眼見真係好大隻,好爽好彈牙.果然,有咁既價錢就有咁既質素.

上湯芥蘭 
芥蘭好爽脆,完全唔老,一d苦味都冇. 而且唔太油,冇味精.

揚州排骨($48一位)
好鬆好軟既排骨,肥瘦適中,油脂分怖得好均勻,肉軟到唔會好痴全條骨,而佢既汁亦好入味,濃但唔咸,就算係伴碟既配菜亦都十分出色.

怡東脆皮雞 ($280一隻)
其實隻雞唔算好大隻, 但做到皮好脆好薄,肉真係十分嫩滑,又唔會好肥.不過雞胸就遜色少少,唔算鞋但未能做到滑既效果.最好都係食近腿部分.旁邊既蝦片都好脆,唔會'林'哂.

豆豉帶子蒸豆腐($1xx)
由於唔食豆豉,所以豆豉係冇入口.帶子新鮮,不過好食唔稱得上,豆腐亦唔太滑.較遜色既一味菜.

京燒鹿腩($168)
賣相好,夠新穎.第一次食鹿腩.仲騷過食羊肉, 就算有下面既青瓜同脆餅都頂唔順.食左一啖,肉比較硬身,味道好似食老左既牛肉咁.不過個種騷味都係頂唔順,自問羊肉都可以食,但呢個連我都接受不了....

菠蘿咕嚕肉($128)
好有驚喜既一味平凡的菜!!看似普通,食落同出面街食既一般咕嚕肉真係天同地比!!佢既肉係用豬柳,再炸得剛脆既程度,完全唔油膩.豬柳超鬆化,佢既汁亦唔會太甜太酸,剛剛好! 略嫌菠蘿少左d,不過驚喜不在菠蘿,所以不需要太在意.

南瓜海鮮焗炒飯($158)
一個南瓜飯10個人分每人可以分到半碗仔,其實唔太夠. 不過呢個飯榮獲2002年[美食之最]至高榮譽金獎(飯組),所以點都要試下.食落真係名不虛傳!配料豪華,有石班粒,帶子,蝦粒,南瓜..等等,仲加有一粒粒好似油炸鬼既薄脆粒,令成碗飯更有口感.而且飯粒炒至乾身,每粒飯都好入味.真係冇可挑剔.

雖然呢餐飯埋單應該唔平,不過服務態度好,食物質素好,環境乾淨企理寧靜,都算物有所值.

怡東軒
Yee Tung Heen

銅鑼灣告士打道281號怡東酒店2樓 
Tel:2837-6790/2894-8888

沒有留言:

張貼留言

Related Posts Plugin for WordPress, Blogger...